البرلمان ماشي حرفة
شُوف، هاد القضية ديال الأحزاب اللي باقة حابسة في نفس الوجوه، ولّات كتشبه لشي سيتكوم قديم كيتعاود كل رمضان، وحنا حافظين الحوار ديالو وعارفين النهاية كي دايرة. ملي حزب كيجي كيرشح ليك شخص دوز 20 عام أو كتر وهو جالس تحت القبة، راه هاد الحزب بحال إلى داير مود (offline) وما عايشش معانا في المغرب ديال 2026.
شنو هي القيمة المضافة اللي غادي يعطيها واحد ناض ليه الشيب في البرلمان ربع قرن؟ السياسة راه تكليف ظرفي وماشي حرفة أو كارير دائمة الواحد يبني فيها مستقبلو. ملي كتحول الصفة البرلمانية لمهنة، تما كتموت الروح ديال الديمقراطية وتمثيل المواطنين، وكتولي الحسابات ضيقة ديال شحال غادي نستفد ماشي شحال غادي نفيد.
قبل ما تعطي التزكيات الأحزاب خاصها تدير إطلالة حقيقية على نتائج الإحصاء العام للسكن والسكنى، باش تفهم بلي المغرب تبدل. هاد الشباب اللي تزادوا مورا سنة 2000، راه جيل الديجيتال، جيل باغي السرعة والنتائج الواضحة ماشي لهضاضرية وبياعي الكلام. تخيل دري تزاد فاش بعض البرلمانيين طلعوا أول مرة، ودابا هاد الدري تخرج من الجامعة ودار مستقبلو، وباقي كيشوف نفس الوجه ونفس الهضرة في التلفزة! هادشي راه كيطلع الدم وكيخلي الشباب يكفروا بالعمل السياسي جملة وتفصيلاً.
راه ما يمكنش نطلبو من الشباب ينخرطوا في الحياة السياسية وحنا كنقدمو ليهم أرشيف متحرك. خاص النفس جديد، وجوه كتشبه للمغاربة ديال دابا، وجوه كتعرف بلي البرلمان راه محطة للخدمة والرحيل، ماشي دار الورثة اللي كيدوز فيها الواحد حياتو كاملة حتى كيولي جزء من الحيط.
